Komunika komunikazioa ulertzeko modu bat da. Hitzak hautatzea ez ezik, haien bidez harremanak ehuntzea, ideiak argitzea eta nortasunak eraikitzea ere komunikatzea da. Guretzat komunikazioa ez da pauso bakarra, baizik eta prozesu oso bat: ideia entzutea, ulertzea, forma ematea eta zabaltzea. Horregatik, hain zuzen ere, komunikazio agentzia integrala gara. Ez dugu kanalik lehenesten, testuingurua ulertu eta hari egokitzen zaion estrategia eraikitzen dugu.

Komunikan “zer” egiten dugunetik haratago, “nola” egiten dugun da garrantzitsuena; lanari arreta eskaintzen diogu eta zuekin batera hausnartu eta pentsatzen dugu. Ez gara zerbitzu-emaile hutsak; bidelagun estrategikoak gara, zuen ideiak komunikatzen  laguntzeko.

Aiaraldea Kooperatiba Elkartea

Komunika Aiaraldea Kooperatiba Elkartearen baitan dagoen ildoetako bat da. Aiaraldea irabazi asmorik gabeko gizarte ekimeneko kooperatiba da, 509 bazkide erabiltzaile eta langilek kudeatua. Komunikaren helburu nagusia kooperatibaren funtzioak aurrera eramateko sostengu ekonomikoa izatea da.

2010. urtean elkarte bezala sortu zen eta Aiaraldean euskarazko komunikabidea sortu eta elikatzeko langintzan aritu ginen bost urtez. Lan horren fruitu dira gure eskualdean hedapen handiena duten aiaraldea.eus webgunea (2.500 erabiltzaile egunero) eta Aiaraldea Hemen paperezko hamaboskaria ere (7.000 ale doan eskualde osoan). Ordura arte euskararen biziberritzea komunikazioaren esparruan kokatzen bagenuen ere, ordutik aurrera bizitzako esparru guztietan euskaraz egituratuko ziren alternatiba eraldatzaileak lantzea erabaki genuen .